Орынбасар Рүстемұлының Ұлттық бірыңғай тестілеуде жоғары нәтиже көрсетіп, 117 балл жинады
2025-2026 оқу жылында №6 ЖОББМ түлегі Орынбасар Рүстемұлының Ұлттық бірыңғай тестілеуде жоғары нәтиже көрсетіп, 117 балл жинауы. Бұл – тек бір оқушының ғана емес, ұстаздар мен ата-ананың, тұтас мектеп ұжымының ортақ жеңісі. Тұрар Орынбасар Рүстемұлы мектеп қабырғасында білімге құштарлығымен, ізденімпаздығымен және жауапкершілігімен ерекшеленген оқушылардың бірі болды. Ол әрдайым алдына нақты мақсат қойып, сол мақсатқа жету жолында табандылық таныта білді. ЕНТ-ға дайындық кезеңінде де уақытын тиімді пайдаланып, жүйелі түрде білімін жетілдірді. Нәтижесінде таңдаған пәндері – дүние жүзі тарихы мен география бойынша терең білімін дәлелдеп, жоғары көрсеткішке қол жеткізді. Дүние жүзі тарихы – адамзат өркениетінің даму жолын танытатын маңызды ғылым болса, география – әлемнің табиғаты мен экономикасын, халықтары мен мемлекеттерін зерттейтін кең ауқымды пән. Осы екі пәнді терең меңгеру үлкен ізденісті, логикалық ойлауды және жан-жақты білімді талап етеді. Тұрар Орынбасардың жоғары нәтижесі оның білімге деген шынайы ынтасы мен қажырлы еңбегінің айқын көрінісі болды. 117 балл – кездейсоқ жетістік емес. Бұл – күнделікті еңбектің, ұстаздардың сапалы білім беруінің және ата-ананың қолдауының нәтижесі. Әрбір жетістік артында төгілген тер, жұмсалған күш-жігер мен үлкен жауапкершілік тұратыны белгілі. Тұрар Орынбасар осы жолда табандылық танытып, өзінің білім деңгейін жоғары дәрежеде көрсете білді. Бүгінде Орынбасардың жетістігі мектеп оқушылары үшін жарқын үлгіге айналып отыр. Оның табысы білімге ұмтылған әрбір жасқа «Еңбек пен талап болған жерде алынбайтын асу жоқ» деген ойды дәлелдейді. Жас түлектің бұл жетістігі болашақта да биік белестерді бағындыруына берік негіз болары сөзсіз. №6 жалпы орта білім беретін мектебінің ұжымы Тұрар Орынбасар Рүстемұлын жоғары нәтижесімен шын жүректен құттықтайды. Алдағы өмір жолында толағай табыстар, биік мақсаттар мен жарқын жетістіктер тілейміз. Білімнің биік шыңынан көрініп, еліміздің дамуына үлес қосатын білікті маман атана беруіне сеніміміз мол.